alana

هى زى هبهانة وما هبهانة
وزى بنانة وما بنانة
غايتو نحن مجننانا
حتة حتة مكسرانا
لسة ما عرفتوها برضو
دى ما ألانا
ألانا خلتنا عاد ننضم برانا
غايتو لو سكنت حدانا
نحن ما الله معانا
ألانا ما بتاكل فتة أصلو
وما بتمشى الأجزخانة
فيها حاجات مغلغلانا
تلاتة شامات جنب خدودا وجنب اضانا
اضانا زاتا مطنشانا
تلاتة حاجات لاها وحدى ولا توأيز
وفيها أيز اى واحد شافا مرة
الجماعة رقدوا خردة
أولويز بيبل راقدين جنايز
إف أنا مرة إغتربت
ولى أمورى أورقانايز
لى ابوها جوة هاوسو بمشى ليهو وما بلاوز
اصلى حربى وفقري ييشن
اقولوا امايستميشن انى يور دوتا
رهيبة وليها عايز اعرسيشن
اف هو قال لى رافضيشن
ولى عيونو حمريشن
بقولو ليشن وبالحجارة بجدعيشن
وابقى بيشن
ألانا جاتنا فى الخرطوم هنا
الجماعة جنس دفر وجنس عفص
وجنس كبع وحريمنا عاد فتحولو تب
من الزعل داير ينفقع
ألانا جاية من استراليا
جكسينا عاد امبدة والديم والربع
ألانا جاية من استراليا
لابسة جنز بلوزة غالية
جكسينا ناس جكس العباية
وفى العباية قماش ملاية
ألانا جاتنا بقوها زى ست الودع
جاها واحد قال ليها يا ألانا
جُُري كبسولة الزمن دى شهرين لى قدام
شوفينى بعد الامتحانات بباصى ولا بتشلع
جاتا وحده قالت ليها الرسول يا ألانا
تجرى كبسولة الزمن دى عشرين سنة
شوفينى بتزوج ولا شاكوش بتلبع
بعدين ألانا لا بتنخلط ولا بتقتنع
الا لي انا دة فقرى جدا مطلع
انا عاد بخاف
قلت ليها ارح نقعد فى سنة تلاتة ألالاف
وفو مشينا سنة تلاتة ألالاف
قلت ليها تعرفى ناس القرن العشرين
ناس متخلفين ••• سفر بالطيارة
وكمبيوترات وجنس عوارة
اها قمنا راجعين كبسولة الزمن ضهبت
وقعت بينا فى امبدة جنب المزارع
نزلت منها ألانا شافت الناس بتاكل فى الكوارع
جرت للكمبيوتر قالت ليهو يااى
نحن فى ياتو زمن ؟
قال ليها نحن فى الزمن الضائع
ألانا معاها وحدى قالوا جانا
يعنى بس بالشايقى جينى
يالحلوى وظريفى
الكريشة ماها ظاهرى والرويس تب ماهو نيفى
جينى قمى وكونوا زاتا نشوفا نحنا
دى زاتا نعمى
والشايقى فيها اندهش داير
قول دة الشغل قال دى الخدمى
يا وجع ساكن كلانا
الا جد جد وبامانة فى بناتنا بنلقى
مليون زى ألانا
فى السماحة عسل بدفق
ومسخن سكر كنانة
وفى العلم افكار دؤوبة
شان يطوروا مستوانا
فى بناتنا بنلقى حاجة ما بنلقاها فى ألانا
فيهن العفة الرزانة
وفيهن الامل البيضوى
فى مدنا وفى قرانا

هههههههههههههههههههههههههه
براحة ياعميل

يا عميل شيل الصبر عندهم كلاب

كلاب ولا بقر

يا عميل ما عرفتها دي ما الانا القوز

شجرة نبق ولا شنو ياحاج